1202

Ақтауда қабырғасы қақырай бастаған жаңа баспана қайта жөнделетін болды

Сапасыз құрылыс сыр берген.
Фотография - Ақтауда қабырғасы қақырай бастаған жаңа баспана қайта жөнделетін болды Сурет: 24.kz

Ақтауда қабырғасы қақырай бастаған жаңа баспана қайта жөнделетін болды, деп хабарлайды Today.kz 24.kz арнасына сілтеме жасап.

Қала әкімдігі құрған комиссия қазір мәселені зерттеп жатыр. 288 пәтерлі "Заветная мечта" тұрғын үй кешені 2015 жылы қолданысқа берілген. Алайда қоныс тойын тойлаған халықтың қуанышы ұзаққа созылмады. Сапасыз құрылыс сыр берді. Ал осы кешенді жөндеуге келген жұмысшының қақырай бастаған қабырғаны сырлап жатқаны туралы бейнежазба ғаламторда пайда болған соң, шу шықты. Белгілі болғанындай, бастапқы мердігер істі аяқтамай тастап кетіп, үй салуды екінші құрылыс мекемесін жалғаған екен. Үш бөліктен тұратын жаңа ғимараттың кепілдік мерзімі әлі аяқталған жоқ. Демек оның кем-кетігін соңғы мердігер өз қаражатына түзейді. 

"Қала әкімінің тапсырмасына сәйкес, тиісті бақылаушы органдармен бірге сол үйлерді түгел аралап шықтық. Соңғы мердігердің қателіктері де болуы мүмкін. Бұрынғы мердігердің де қателіктері болуы мүмкін. Арнайы белгіленген мекемелер бар. Лицензиясы бар. Сол мекемелердің қорытындысымен тиісті жұмыстар белгіленіп, мердігерге тапсырмалар берілетін болады. Осы жұмыстарды толығымен қадағалап, аяқталуына біз назар саламыз", – дейді қалалық құрылыс бөлімінің басшысы Қайрат Ақыбаев.


Загрузка...