Нұрсұлтан Назарбаев Астанада Пан Ги Мунмен және Франсуа Олландпен кездесті

Фотография - Нұрсұлтан Назарбаев Астанада Пан Ги Мунмен және Франсуа Олландпен кездесті

Сурет: akorda.kz

Мемлекет басшысы олардың Астана экономикалық форумына келгені үшін алғыс білдірді.

329 0

Нұрсұлтан Назарбаев Астана экономикалық форумы аясында Біріккен Ұлттар Ұйымының сегізінші Бас хатшысы, Боао Азия форумы кеңесінің төрағасы Пан Ги Мунмен және Францияның бұрынғы Президенті, Франция Конституциялық Кеңесінің мүшесі Франсуа Олландпен кездесті, деп хабарлайды Today.kz Ақордаға сілтеме жасап. 

Астана экономикалық форумы аясында өткен кездесу барысында Нұрсұлтан Назарбаев Пан Ги Мунның Біріккен Ұлттар Ұйымын дамытуға зор үлес қосқанын атап өтті.

"Сіз Қазақстанда бірнеше рет болдыңыз. Біз ядролық қарусыздану бағдарламасы бойынша бірлесе жұмыс істедік. 29 тамыз бүкіл әлемде Ядролық сынақтарға қарсы іс-қимыл күні ретінде атап өтіледі. Сізбен және Корея Республикасымен арамызда өте жақсы достық қарым-қатынас қалыптасты", – деді Мемлекет басшысы.

Пан Ги Мун Астана экономикалық форумы жаһандық сын-тегеуріндерді талқылап, оларды еңсеру жолдарын табу ісінде маңызды рөл атқаратынын айтты.

"Мен Қазақстанға жаңа қызметімде алғаш рет келіп отырғаныма қуаныштымын. Жаһандық көптеген проблемалар бар, мен оларды шешуге қолдау көрсетуге әзірмін. Астана экономикалық форумы тек қазіргі өзекті тақырыптарды ғана емес, сондай-ақ жаһандық дамудың келешектегі мәселелерін де талқылауға арналған алаңға айналып отыр", – деді Боао Азия форумы кеңесінің төрағасы.

Әңгімелесу барысында тараптар Боао Азия форумы мен Астана экономикалық форумы арасындағы ынтымақтастық мәселелерін, сондай-ақ "жасыл" технологияларды дамыту саласында, ғылыми-инновация секторы мен білім беру ісінде байланыстар орнатудың перспективаларын талқылады.

Фото -

Нұрсұлтан Назарбаев Астана экономикалық форумына қатысуға келгені үшін Франсуа Олландқа ризашылық білдірді.

"Сіз Президент кезіңізде біздің елде ресми сапармен болған едіңіз. Соның нәтижесінде ынтымақтастығымызды дамыту үшін жақсы жағдай жасадық", – деді Қазақстан Президенті.

Мемлекет басшысы қазіргі уақытта Қазақстан мен Франция арасындағы байланыстар, соның ішінде "жасыл" технологиялар саласындағы ықпалдастық нығайып келе жатқанын айтты.

Нұрсұлтан Назарбаев баламалы энергетиканы дамыту үшін Қазақстан тарапынан атқарылып жатқан жұмыстар, соның ішінде "ЭКСПО-2017" кешенінің базасында құрылатын "Жасыл" экономика орталығы жөнінде әңгімеледі.

Франсуа Олланд кездесуге мүмкіндік бергені үшін Нұрсұлтан Назарбаевқа алғыс білдіріп, Қазақстан Президентінің мемлекетаралық байланыстарды нығайтуға зор үлес қосқанын атап өтті.

Естеріңізге салайық, Астана экономикалық форумы елордада өз жұмысын 17 мамырда бастады. Шарада сөз сөйлеген Назарбаев 5 жаһандық трендті атады




Загрузка...

Пікір (0)

  • Кіру
  • Тіркелу
  • Құпия сөзді ұмыттыңыз ба?