1444

Дәурен Абаев Мәдина Әбілқасымоваға қатысты пікірге жауап берді

None
Фотография - Дәурен Абаев Мәдина Әбілқасымоваға қатысты пікірге жауап берді Сурет ашық дереккөзден алынды

Ақпарат және коммуникациялар министрі Дәурен Абаев Еңбек және халықты әлеуметтік қорғау министрі Мәдина Әбілқасымованың отставкаға кетуі жөніндегі әлеуметтік желідегі талапқа қатысты пікірін білдірді, деп хабарлайды Today.kz ҚазАқпаратқа сілтеме жасап. 

"Тым қайғылы жағдай орын алды. Қаралы отбасының басынан кешіріп жатқан күндерін ең қорқынышты түсіңде де елестету мүмкін емес. Бүкіл ел қазір бес бүлдіршіннің ата-анасымен бірге қайғы жамылып отыр" , - дейді Дәурен Абаев. 

Сондай-ақ, министр қазіргі таңда әлеуметтік желіде тарап жатқан Еңбек және халықты әлеуметтік қорғау министрі Мәдина Әбілқасымованың отставкаға кетуі туралы талаптың әділетсіз екенін түсіндірді: 

"Алайда, менің ойымша, балалардың өліміне министр Әбілқасымоваға ғана бар кінәні арту әділетсіз болар еді. Келісемін, ешкім де жауапкершіліктен жалтармауы керек. Айналып келгенде, біз - бүкіл мемлекеттік аппарат - елімізде болып жатқан барлық жайларға жауаптымыз. Бір нәрсені түсінуіміз керек, осы қайғылы оқиғаға бір ғана емес, бірнеше фактор себеп болды және барлық мәселені Еңбек және халықты әлеуметтік қорғау министрлігінің жұмысы шеше алады деуге келмейді. Мәдина Ерасылқызының өзі де, әйел ретінде, үш баланың анасы ретінде  бұл жағдайды ауыр қабылдады. Сол себепті, тек конструктивті сын қалып, арандату тоқтайды деген үміттемін. Оның үстіне мен министр Әбілқасымованы өз ісіне адал кәсіби маман ретінде білемін", - дейді Дәурен Абаев.

Естеріңізге салайық, 4 ақпан түнде Астанада қайғылы оқиға болды. "Сарыарқа" ауданы "Көктал -1" тұрғын үй алқабында жеке ұй аумағында уақытша баспана өртенді. Салдарынан 2006, 2009, 2014, 2016 және 2018 жылы туған бес бала қайтыс болды.