696

Ұлттық тестілеу орталығына жаңа басшы тағайындалды

ҰТО Ұлттық бірыңғай тестіні, абитуренттерді кешенді тестілеуді, ҚазТест сияқты маңызды сынақтарды ұйымдастырады.
Фотография - Ұлттық тестілеу орталығына жаңа басшы тағайындалды Сурет: facebook.com/@saintdid

Дидар Смағұлов ҚР БҒМ Ұлттық тестілеу орталығының басшысы болып тағайындалды, деп хабарлайды Today.kz. Бұл туралы Дидардың өзі Facebook желісіндегі парақшасында жазды. 

"Қасиетті Жұманы жаңа лауазымнан бастаймын! Білім және ғылым Министрлігінің Ұлттық тестілеу орталығына ауыстым! Білім және ғылым министрі Асхат Аймағамбетовтың шақыртуын қабыл алдым. Сырт көзге сынау оңай, өзің бастап бірдеңені түзету қиын. Маған ҚР БҒМ Ұлттық тестілеу орталығы директорлығы міндеті жүктелді", – деді Смағұлов. 

Ол өзіне артылған жауапкершілікті сезінетінін айтты. ҰТО Ұлттық бірыңғай тестіні, абитуренттерді кешенді тестілеуді, ҚазТест сияқты маңызды сынақтарды ұйымдастырады. 

Жаңа басшы ҰБТ-да кеткен қандай да бір олқылық болса, мына нөмерге хабар беруді сұрады: +7 7172 69-50-87

Айта кетейік, ҰТО-ның бұрынғы басшысын сыбайлас жемқорлыққа қарсы қызмет өкілдері ұстап, қамап тастаған еді.