Қазақстан Сочи Олимпиадасыда 2 алтын, 2 күміс, 2 қоладан үмітті

Фотография - Қазақстан Сочи Олимпиадасыда 2 алтын, 2 күміс, 2 қоладан үмітті

Талай спортшының сан жылдардағы еңбегінің өтеуі, төккен терінің қайтарымы болар сәт ХХІІ қысқы Олимпиада ойындарының басталуына да 2 айдан сәл астам уақыт қалды. Ресейдің Сочи қаласында өтетін бұл дүбірлі додаға әлемнің 80-нен астам елінің 5 мың спортшысы қатысып, спорттың 15 түрінен 98 медаль жиынтығын сарапқа салмақ

212 0

Талай спортшының сан жылдардағы еңбегінің өтеуі, төккен терінің қайтарымы болар сәт ХХІІ қысқы Олимпиада ойындарының басталуына да 2 айдан сәл астам уақыт қалды. Ресейдің Сочи қаласында өтетін бұл дүбірлі додаға әлемнің 80-нен астам елінің 5 мың спортшысы қатысып, спорттың 15 түрінен 98 медаль жиынтығын сарапқа салмақ.

4 жылда бір рет өтетін Олимпиада ойындары әлемдік спорттың ең биік шыңы десек, ал осы байрақты бәсекенің жеңіс тұғырына көтерілу әрбір спортшының басты арманы, мемлекеттің саяси һәм экономикалық жағынан қуатты екендігінің әрі қарқынды дамуының белгісі екендігі сөзсіз. Қазақ елі де осы қысқы ойындарда өзінің қауқарлы ел екендігін әлем жұртшылығына паш ету үшін бар күш-жүгерін жұмсайтындығы анық. Жалпы, бұл Олимпиада ойындары Қазақстанның Тәуелсіздік алғаннан бергі 6-шы байрақты бәсекесі. Есте болса, бұған дейін 1994 жылы өткен Лиллихаммер Олимпиада ойындарында даңқты шаңғышымыз Владимир Смирновтың бір өзі 1 алтын, 2 күміс еншілеп, жалпы командалық есепте Қазақстан 12-ші орынға тұрақтаған еді. Мұндай нәтиже егемендігін енді алып, етек-жеңін әлі де қымтап үлгермеген Қазақ елінің әлемдік деңгейдегі спорттан алар орнын бірден айқындап берген болатын. Дегенмен, өкінішке орай, одан кейінгі қысқы ойындарда спортшыларымыз тиісті деңгейде өнер көрсете алмады. 1998 жылы Наганода өткен Олимпидада 2 қола жеңіп алсақ, 2002 жылғы Солт-Лейк-Ситиде, 2006 жылы Туринде жүлдеден мүлдем қағылдық. Соңғы, 2010 жылғы Ванкувер қысқы ойындарында 1 ғана күміспен 25-ші орынға тұрақтаған едік.

Ал бұл жолғы Олимпиада ойындарында қазақстандықтар спортшыларымыздан зор жетістік күтетіндігіміз шындық. Мұны еліміздің Спорт және дене шынықтыру істері агенттігінің төрағасы Тастанбек Есентаев та айтып отыр. Бүгін Үкімет отырысында 7-23 ақпан аралығында Сочиде өтетін 22-ші қысқы Олимпиада ойындарына спортшыларымыздың дайындығы жайында баяндаған оның айтуынша, қысқы спорт түрлерінен еліміздің ұлттық құрамасына 2 алтын, 2 күміс, 2 қола медаль жеңіп алу міндеті жүктелген. Ал мұндай көрсеткіштер Қазақстанның жалпыкомандалық есепте 20-23 орынға таласуына мүмкіндік береді.

Жалпы, агенттік басшысының сөзіне қарағанда, қазіргі күні спорттың 7 түрінен 33 қазақстандық спортшы олимпиада ойындарына қатысу құқығын жеңіп алды. Дегенмен олар олимпиадаға дейін жеңіп алған лицензияларын қуаттау үшін әлем кубоктарының барлық кезеңдеріне қатысуы тиіс. Лицензиялардың басым бөлігі Шығыс Қазақстан, Ақмола, Павлодар, Батыс Қазақстан облыстарының және Алматы қаласының спортшыларының еншісінде. Сонымен қатар Ақтөбе мен Қарағанды облыстарының да өкілдері лицензия алып отыр. «Толықтай алғанда лицензиялық кезең аяқталғанға дейін спорттың 10 түрінен 40-тан астам лицензия ұтып алуды жоспарлаудамыз. Елдің олимпиадалық құрамасын жасақтау атлеттердің физикалық дайындық деңгейін, олардың психологиялық тұрақтылығын, сондай-ақ қорытынды іріктеу кезеңдерінің және допингке қарсы бақылаудың нәтижелері ескеріле отырып келесі жылдың қаңтарына дейін жалғасатын болады», - деді ол.

Оның сөзіне қарағанда, спортшыларымыздың зор нәтижеге қол жеткізуі үшін барлық жағдай жасалған. Мәселен, күтілетін нәтижеге байланысты еліміздің жетекші спортшыларымен 700-ден 6 мың АҚШ долларына дейінгі көлемдегі төлемге келісімшарт жасалған. Бұдан бөлек, спорттың 8 түрінен ұлттық құрама командамызды 17 жетекші шетелдік маман дайындау үстінде. Бір қызығы, еліміз шаңғышыларымыздың шаңғысын майлауды да әлі күнге дейін үйрене алмай жүр екен. Сондықтан болар, келісімшарт арқылы қызметке тартылған қызметшілер арасында спорт медицинасы саласындағы мамандармен қатар шаңғы майлаушылар да жүр.

Т. Есентаевтың айтуынша, қазіргі уақытта Қазақстан спортшылары шаңғы жарысынан, биатлоннан, фристайл-могулдан, конькимен жүгіруден, мәнерлеп сырғанаудан және сноубордтан жүлделі орындарға көтерілуге мүмкіндігі бар. Бұл ретте еліміздің Спорт агенттігі шаңғы жарысында Алексей Полторанин, Николай Чеботько және Д.Володькоға зор сенім артып отыр. Олар Канадада өткен Әлем кубогы кезеңдерінде жүлделі орындардан көрінген болатын. Ал 2013 жылғы әлем чемпионатындағы конькимен жүгірушіміз Денис Кузиннің жетістіктері де оған зор сенім артуға мүмкіндік береді. Сонымен қатар мәнерлеп сырғанаушымыз Денис Теннің де соңғы байрақты бәсекедегі жеңісі үміт отын ұялатады.

Сөз соңында агенттік басшысы қазақстандық делегацияның құрамы жасақталып жатқандығын атап өтті. Оған жалпы 100-ден астам адамды құрайтын спортшылар, жаттықтырушылар, мамандар және штаб кірмек. «Сондай-ақ, біздің құраманы қолдау үшін Сочиге тамақпен, тұрғылықты жермен және спорттық формамен қамтамасыз етілген бірыңғай ұйымдасқан топта шамамен 300 жанкүйер жіберуді ұсынамыз», - деген ол Сочидегі олимпиада қалашығы аумағында қазақстандық баспасөз орталығы жұмыс істейтіндігін де айтты. Оның атап өтуінше, аталған орталықта Астана қаласында өтетін «ЭКСПО-2017» халықаралық көрмесін, еліміздің тәуелсіздік жылдарындағы жетістігін және спортшыларымызды ұлықтау шаралары ұйымдастырылатын болады. Сондай-ақ, Халықаралық олимпиадалық комитетке Алматы қаласында 2022 жылы 24-ші қысқы олимпиада ойындарын өткізуге өтінім берілгендігін баса айтқан ол: «Бұл мақсаттарда Сочи қаласында өтетін олимпиада аясында жоғарыда аталған олимпиада ойындарын өткізуге үміткер ел ретінде Қазақстанды алға жылжыту бойынша имидждік іс-шаралар өткізу жоспарлануда»,-деді.

Үкімет отырысын қорытындылаған Премьер-Министр Серік Ахметов Олимпиада ойындарындағы спорттық жетістік кез келген мемлекеттің имиджі мен мәртебесінің маңызды көрсеткіштерінің бірі болып саналатындығын баса айтты. «Сондықтан қазіргі уақытта спортшылардың сапалы дайындығы қажет екендігін түсіну өте маңызды. Уақыт тым аз қалды. 7 ақпанда Сочидегі Олимпиада ойындары басталады. Сондықтан, Спорт және дене шынықтыру істері агенттігіне сапалы дайындықты қамтамасыз етуді тапсырамын. Бұл үшін сіздер барлығымен қамтамасыз етілдіңіздер. Баспасөз қызметінің жұмысын, жанкүйерлердің қатысуын ұйымдастыру қажет»,-деді Үкімет басшысы.


Загрузка...

Пікір (0)

Input is not a number!
Input is not a email!
Input is not a number!