1175

Геннадий Головкин Дэниел Джейкобсқа қарағанда жеңіл болып шықты

Головкиннің салмағы 165,1 фунт болса, Джейкобстың салмағы 174,8 фунтқа тең.
Фотография - Геннадий Головкин Дэниел Джейкобсқа қарағанда жеңіл болып шықты Сурет ашық ақпарат көздерінен алынды

WBC ережесі бойынша, қазақстандық Геннадий Головкин мен америкалық Дэниел Джейкобс арасында болатын жекпе-жекке 30 күн қалғанда салмақ өлшеу рәсімі өтті деп, хабарлайды Today.kz Республикалық Sports.kz сайтына сілтеме жасап.

Головкиннің салмағы 165,1 фунт (74,3 килограмм), болса, Джейкобстың салмағы 174,8 (78,7 килограмм) фунтқа тең. Екеуі 176 фунттың лимитіне кірді.

Головкин мен Джейкобстың жекпе-жегі

Естеріңізге сала кететін болсақ, 2016 жылдың 18 желтоқсанында, орта салмақтағы әлем чемпионы, қазақстандық Геннадий Головкин, орта салмақтағы америкалық кәсіби боксшы Дэниел Джейкобспен өтетін жұдырықтасудың күнін ресми түрде жариялады.

Головкин 2017 жылдың 3 қаңтар күні, Дэниел Джейкобспен болатын кездесуге дайындалу үшін, Big Bear жаттығу лагеріне келді.

11 қаңтарда, Нью-Йорктегі Madison Square Garden аренасында өткен баспасөз мәслихатында қазақстандық және америкалық боксшылар Геннадий Головкин мен Дэниел Джейкобс жекпе-жек алдында алғаш рет бір-бірімен жүздесіп, көзбен сес көрсетті.

Боксшының бапкері Абель Санчес: «Джейкобс – қауіпті қарсылас. Сол үшін де, Головкин өте ыждахаттылықпен дайындалып жатыр. Оның жекпе-жегі болмаса да, ол қараша айында лагерге дайындалуға барды, жаңа жылдан кейінгі екінші күні тағы жаттықты. Ол жаттығуды 12 қаңтар күні қайта жалғастырады».

Геннадий Головкин кәсіпқой рингке 36 рет шығып, 36 рет жеңіске жетіп, кездесулердің 33-ін нокаутпен аяқтады.

Америкалық боксшы 32 рет жеңіске жетіп, бір мәрте есе жіберіп алған.