Қостанай облысы аумағындағы Екатеринбург-Алматы тасжолында КамАЗ көлігі мен К-700 тракторының соқтығысуынан ірі көлік апаты орын алып, бір адам қаза тапты.

Облыстың ІІД баспасөз қызметі жол апатының Сарыкөл ауданы аумағында болғанын жеткізген. КамАЗ жүргізушісі 35 жасар ер адам болған. Көлікте оның 56 жасар серігі отырған. Оларға қарсы бағытта тіркемесі бар, шөп тиеген К-700 тракторы жүріп келе жатқан. КамАЗ жүргізушісі қалғып кетіп, сол тракторға барып соққан. Жүк көлігіндегі жолаушы оқиға орнында қайтыс болды. Трактордағылар дін аман.

Айта кетейік, КамАЗ жүргізушісіне қатысты «Көлiк құралдарын жүргiзушi адамдардың жол қозғалысы және көлiк құралдарын пайдалану ережелерiн бұзуы мен абайсызда адамның денсаулығына ауыр зиян келтiруі» бабы бойынша қылмыстық іс қозғалды. Ер адам 5 жылға бас бостандығынан,  3 жылға көлік жүргізу құқығынан айырылуы мүмкін. Ақпарат 1tv.kz сайтынан.