7515

Имам 11 жастағы тайландтық қызды үшінші әйелі етіп алды

Той Тайландта өткен, ал имамның екі әйелінің бірі тойдан сурет түсіріп, оны желіге жүктеп жіберген соң, тергеу басталған.
Фотография - Имам 11 жастағы тайландтық қызды үшінші әйелі етіп алды Сурет: news.com.au

Малайзия билігі Тайландтан 11 жастағы қызды әйелдікке алған Келантан штатындағы имамға қатысты тергеу жұмыстарын бастады, деп хабарлайды Today.kz South China Morning Post сайтына сілтеме жасап. 

41 жастағы Че Абдул Кәрім Че Абдул Хамид қызды 16 жастан бастап әйелдікке алуға рұқсат беретін мұсылмандар заңын бұзды. 

Ер адамның екі әйелі мен алты баласы бар. 

Имамның өзі де, қыздың әкесі де келісім бойынша қыз ата-анасының үйінде 16 жасқа толғанша қалатынын мәлімдеді. Әкесінің сөзінше, қыз имаммен таныс болған. Имам алғаш рет қызды әйел етіп алуға ниет білдіргенде, қыздың жасы кішкентай екенін айтып, бұл ұсыныстан бас тартқан. Бірақ имам қыз бойжеткенше өз үйінде тұра беретінін, жасы толған соң өзімен бірге әкететінін айтқан. 

Қыздың әкесінің сөзінше, ол некеге тұрған соң ата-анасының үйінде қалған. 

Той Тайландта өткен, ал имамның екі әйелінің бірі тойдан сурет түсіріп, оны желіге жүктеп жіберген соң, тергеу басталған. Егер сот имамды кінәлі деп тапса, ол алты жылға бас бостандығынан айырылып, 247 доллар көлемінде айыппұл төлеуі мүмкін.