770

Армения Президенті ҚР Елшісі арқылы Назарбаевқа жылы құттықтауын жолдады

Ол қазақстандықтарды келе жатқан Тәуелсіздік күнімен құттықтады.
Фотография - Армения Президенті ҚР Елшісі арқылы Назарбаевқа жылы құттықтауын жолдады Сурет: ҚР СІМ баспасөз қызметі

Қазақстан Республикасының Тәуелсіздігінің 27 жылдығына орай, Қазақстанның Армениядағы Елшісі Тимур Оразаев Армения Президенті Армен Саркисянмен кездесті, деп хабарлайды Today.kz ҚР СІМ баспасөз қызметіне сілтеме жасап. 

Кездесу барысында Армен Саркисян Қазақстан Президенті Нұрсұлтан Назарбаевқа өзінің жылы құттықтауын жолдай отыра, оның егемен және заманауи Қазақстанның қалаушысы ретіндегі қосқан маңызды үлесін атап өтті. Сондай-ақ Армения Президенті Елбасы Нұрсұлтан Назарбаевтың дана басшылығымен Қазақстан халқына құт-береке мен өркендеу тілектерін жеткізді.

Қазақстандық дипломат еліміздің мемлекеттік кұру жолындағы жаңа қадамдары мен экономикалық саладағы жетістіктері және жуырда жарияланған Мемлекет басшысы Нұрсұлтан Назарбаевтың "Ұлы даланың жеті қыры" мақаласында баяндалған еліміздің бай мұрасын іске асырудың қазіргі заманғы көзқарасы туралы әңгімелеп, Армен Саркисянға аталған мақаланың армян тіліне аударылған мәтінін табыс етті.

Әңгіме барысында тараптар екіжақты қарым-қатынастардың болашағын, атап айтқанда жаңа технологиялар саласындағы жобаларды, өзара тиімді саяси диалогты, оның ішінде Еуразия экономикалық одағы мен БҰҰ шеңберінде өзара әрекеттесу мәселелерді талқылады.