2034

Димаш Құдайберген Жаңа жыл түні Qazaqstan арнасында ән шырқайды

Мерекелік күндерге орай, Ұлттық арна өз көрермендеріне қызықты шоу-бағдарламалар мен арнайы жобалар дайындап отыр.
Фотография - Димаш Құдайберген Жаңа жыл түні Qazaqstan арнасында ән шырқайды Сурет: видеодан скриншот

Димаш Құдайберген Жаңа жылда Qazaqstan арнасында ән шырқайды, деп хабарлайды Today.kz Ұлттық арнаның баспасөз қызметіне сілтеме жасап. 

Мерекелік күндерге орай, Ұлттық арна өз көрермендеріне қызықты шоу-бағдарламалар мен арнайы жобалар дайындап отыр.

Айта кетсек, кішкентай көрермендер әйгілі "Walt Disney" кинокомпаниясының үздік анимациялық фильмдерін тамашалай алады.  31 желтоқсан күні  11:15-те  "Ханшайым мен Құрбақа" көрсетілсе,  1 қаңтарда 11:45-те "Пингвиндер биі",  ал, 2 қаңтар күні 13:20-да "Жұлдызды төбет" және т.б. анимациялық фильмдермен толығады. Бұл анимациялық фильмдердің барлығы "Қазақстан" корпорациясының кинокөрсетілім және дубляж бөлімінде аударылып, дыбысталған.

Сонымен қатар, 31 желтоқсан күні 14:25-те "Алатауым- алтын ұям" атты Республикалық ақындар айтысының 1 бөлімінің тұсаукесері болмақ. Ал, айтыстың  жалғасын, 2 және 3 бөлімдерін  1 қаңтарда 15:35-те және 2 қаңтарда 14:40-та көруге болады. Ұлттық арна әзілсүйер көрермендеріне арнап 18:10-да, "Қазақстан" корпорациясының "Алтын қорында" сақталған, кезінде кеңінен танымал болған "Тамаша" ойын-сауықтық бағдарламасын тарту етпек. Көрермен көзайымына айналған бағдарламаға еліміздің біртуар әртістері Құдайберген Сұлтанбаев, Тоқсын Құлыбеков, Мейірман Нұрекеев және т. б қатысқан болатын.

Одан басқа, 19:45-те белгілі әншілер: Әлішер Кәрімов, Луина және "Формат" тобының қатысуымен "Әзіл әлемі" ток-шоуының жаңа жылдық шығарылымы көрерменге жол тартады. 

Ұлттық арнаның көрермендеріне ұсынатын ең басты сыйы - "20.19 Басты арнадағы Жаңа жыл" атты музыкалық шоу-бағдарламасы  эфирге 21:50-де және 00:00-де шығады. Мерекелік шоуда қазақ эстрадасының танымал әншілері: Мақпал Жүнісова, Бекболат Тілеухан, Жанар Доғалова, Ерке Есмахан, Қайрат Түнтеков, Зируза, Ринго тобы және т.б өз өнерлерін көрсетеді. Ал "20.19 Басты арнадағы Жаңа жыл" шоу-бағдарламасының бас қонағы – әлемге танымал әнші Димаш Құдайберген болмақ.