632

Маңғыстауда екі жұмысшының басына бетон плита құлады

Екеуі де ес-түссіс ауруханада жатыр.
Фотография - Маңғыстауда екі жұмысшының басына бетон плита құлады Сурет: lada.kz

Маңғыстау облысы Шетпе ауылында мектептің құрылыс жұмыстарын жүргізіп жатқан екі жұмысшының басына бетон плита құлады. Қазір екеуі де ес-түссіз Маңғыстау облыстық ауруханасында жатыр, деп хабарлайды Today.kz lada.kz сайтына сілтеме жасап.

Оқиға 25 наурыз күні кешкі 19:30 шамасында болған. Алдымен Шетпе ауылында алғашқы медициналық көмек көрсетілген. 26 наурыз күні екі жұмысшы да Маңғыстау облыстық ауруханасына әкелінген.

Жарақат алған 1966 жылы туған бір жұмысшы өте ауыр жағдайда ауруханаға жеткізілген.

"Ол бас сүйегінен ашық жарақат алған. Қазір комада ауыр жағдайда жатыр. Ота жасап, жан сақтау бөліміне ауыстырдық", – дейді  Маңғыстау облыстық ауруханасының нейрохирургия бөлімінің меңгерушісі Гельман Чагай.

1995 жылы туған екінші жұмысшының да жағдайы мәз емес. Бас сүйегінен жабық жарақат алып, сол жақ қабырғалары сынған.

Екі науқас та өкпесін жасанды желдендіру аппаратына қосылған.