889

Мұхтар Жақышев мерзімінен бұрын бостандыққа шықпайтын болды

Судья жаза мерзімінің жартысын өтеген Мұхтар Жақышевты неге шартты босатпағанын түсіндірген жоқ.
Фотография - Мұхтар Жақышев мерзімінен бұрын бостандыққа шықпайтын болды Сурет: voxpopuli.kz

Семей қаласының №2 соты "Қазатомөнеркәсіп" ұлттық компаниясының экс-басшысы Мұхтар Жақышевтың мерзімінен бұрын шартты босату туралы өтінішхатын қанағаттандырмады, деп хабарлайды Today.kz Sputnik Қазақстан сайтына сілтеме жасап. 

Жақышевтың адвокаты Нұрлан Бейсекеев телефон арқылы хабарлағандай, судья мерзімінен бұрын шартты босатудан неге бас тартқанын түсіндірмеген. "Ол шешімнің қорытынды бөлімін ғана оқыды. Кеңес бөлмесінде көп бөгелген жоқ", — деп мәлімет берді Бейсекеев.

Атап өтсек, Мұхтар Жақышев сотқа қатыспаған, отырыс видео байланыс арқылы жүргізіліпті.

Адвокат Мұхтар Жақышевтың денсаулығы туралы айтты. Ол қан қысымының жоғары болуынан күніне 56 таблетка дәрі ішуге мәжбүр екен. "Қан қысымын 150-170 деңгейінде ұстап тұруға көмектеседі. Бірақ бұл дәрі-дәрмек ішкі органдарына, әсіресе, бүйрегіне кері әсерін тигізеді. Бірақ ішпесе тағы болмайды, себебі жоғары қан қысымы инсультке әкеп соғуы мүмкін", — дейді адвокат.

2010 жылы наурызда Жақышев мемлекеттік бюджетті ысырап жасап, пара алғаны үшін айыпты деп танылған. Ол 14 жылға бас бостандығынан айырылып, қатаң тәртіпті колонияда жазасын өтеп жатыр.