9841

Денис Теннің өліміне күдікті екі жігіттің әрқайсысы 20 жылға сотталуы мүмкін

Арман Құдайбергенов пен Нұралы Қиясов 20 жылға бас бостандығынан айырылуы мүмкін.
Фотография - Денис Теннің өліміне күдікті екі жігіттің әрқайсысы 20 жылға сотталуы мүмкін Сурет: inform.kz

Денис Теннің өліміне күдіктілер – Арман Құдайбергенов пен Нұралы Қиясов 20 жылға бас бостандығынан айырылуы мүмкін. Прокурор Айдар Сибогатов соттан осындай жаза мерзімін сұрады, деп хабарлайды Today.kz Sputnik Қазақстан сайтына сілтеме жасап. 

"Арман Құдайбергеновті айыпты деп танып, 20 жылға бас бостандығынан айыруды сұраймын. Нұралы Қиясовты айыпты деп танып, 20 жылға бас бостандығынан айыруды сұраймын. Жаза мерзімін қылмыстық-атқару жүйесінің максималды қауіпсіздік мекемесінде өтесін", — деп мәлімдеді екінші прокурор Айдар Сибогатов.

Прокурор Жанар Толыбаеваны төрт жылға бас бостандығынан айырып, қылмыстық-атқару жүйесінің орташа қауіпсіздік мекемесіне қамауға алуды сұрады. Әйел адамға "бір топ адамның алдын ала келісіп ұрлық жасауы" және "қылмыс туралы хабарламау" баптары бойынша айып тағылған.

Бұдан бұрын мәнерлеп сырғанаушының анасы Оксана Тен ұлын тапсырыспен өлтіргенін тағы да мәлімдеп, істі қайта тергеуді сұрады. Бірақ сот бұл өтінішті қанағаттандырмады.

Бұдан бөлек, Денис Теннің анасы полиция қызметкерлері Нұрпейісов пен Мұсаевты қызметтегі әрекетсіздік пен салғырттығы үшін жауапкершілікке тартуды талап еткен. Айыптау тарабы жәбірленушілердің бұл өтінішін мақұлдаған жоқ. Судья Кеңшілік Әбділдинов Теннің анасы берген өтінішке екі жақтың жарыссөзінен кейін жауап беретінін мәлімдеді.

Азамат Нұрпейісов – кісі өлімі болған жерге жақын маңда болып, қылмысты көзімен көрген жасөспірімдер ісі бойынша инспектор. Нұрпейісовтің сөзіне сүйенсек, ол Дениске алғашқы көмек көрсетіп, адамдардан "жедел жәрдем" шақыруды сұраған.

Әділбек Мұсаев – қылмыс жасалған кезде Нұрпейісовпен бірге бір көлікте болған оның әріптесі.