1433

Астанада тұрғын үйден өрт шығып, бір отбасының бес баласы қайтыс болды

Олардың әке-шешесі жұмыста болған.
Фотография - Астанада тұрғын үйден өрт шығып, бір отбасының бес баласы қайтыс болды Сурет: ҚР ІІМ ТЖК баспасөз қызметі

Астанадағы өрт кезінде бес бала мерт болды, деп хабарлайды Today.kz "Хабар 24" арнасына сілтеме жасап. 

ҚР ІІМ Төтенше жағдайлар комитетінің мәліметінше, Астана қалалық ТЖД "101" пультіне сағат 02:34-те Сарыарқа ауданындағы Шыңғыстау көшесіне орналасқан жеке үйдің ауласындағы уақытша тұрғызылған баспанада өрт болып жатқаны туралы хабар түскен. 30 шаршы метр ауданды шарпыған жалын салдарынан 25 шаршы метрлік төбесі жабынды опырыла құлаған. Оқиға орнына жеткен өрт сөндірушілер бөлімшесі тілсіз жауды 03:06-да ауыздықтап, 03:24-те толықтай сөндірді. 

Өрт орнынан 2006, 2008, 2013, 2015 және 2018  жылдары туған бес баланың мәйіті табылды. Олардың әке-шешесі жұмыста болған. Өрт сөндіруге Астана ТЖД-нің 17 адамы мен 5 техникасы, сондай-ақ ТЖК Орталық аймақтық аэромобильдік жедел-құтқару жасағының 4 адамы мен 1 техникасы тартылды.

Өрттен ажал құшқан бес бала ата-анасымен уақытша үйде тұрған. Оның өзі бұл тұрғын-жай туыстарынікі болып шықты. Ал қабырғасы қайысқан отбасы бұған дейін үй кезегінде тұрмаған. Бұл туралы қалалық әкімдік өкілдері хабарлады. Шаһар басшысының баспасөз хатшысы Эльвира Жүргенбаеваның айтуынша, төтенше жағдайлар қызметі бұл жанұяға өрт қауіпсіздігін сақтау бойынша екі рет ескерту жасаған. 

Бүгін Астана әкімі Бақыт Сұлтанов қайғы жұтқан отбасыға көңіл айтып барып, оларға барынша психологиялық және материалдық көмек көрсетілетінін айтты. Ал көршілер қаза тапқан балалардың ата-анасы ішімдік ішпейтін, тірлігі тиянақты адамдар деп суреттейді.