598

Арыстағы апаттан екі адам қайтыс болды

Екі адам жан сақтау бөлімінде жатыр.
Фотография - Арыстағы апаттан екі адам қайтыс болды Сурет: instagram/@jar_nama

Арыстағы апаттан екі адам қайтыс болды. Бұл туралы үкімет отырысында ҚР ішкі істер министрі Ерлан Тұрғымбаев хабарлады, деп жазады Today.kz

"ТЖ салдарынан екі адам қайтыс болды – әскери адам мен Арыс тұрғыны. Екі адам жан сақтау бөлімінде, 34 адам ауруханада жатыр. 12 адамға медициналық көмек көрсетілді, олар ауруханаға жатқызылған жоқ", – деді ІІМ басшысы. 

Оның сөзінше, жедел желіге 11 мың қоңырау келіп түскен. 

"Жарылғыш зат жарылып жатқан соң әскери бөлімдегі қоймадан шыққан өртті өшіру қиынға соғып тұр. Қаладан 41 мыңға жуық адам эвакуацияланды: 39 мың адам өздігінен шыққан, 2 815 адам эвакуацияланды. Жақын ауылдарда бес эвакуация пункті жұмыс істеп тұр. Шымкентте эвакуация бөлімшесі бар. Қалада ешкім қалған жоқ деуге болады. Тұрғын үйлерге зақым келді, жарылмай қалған оқтар бар, азаматтарға қалаға кіруге болмайды. Қалада 75 полиция жүр, олар ұрлық болмауын қадағалауда. Дүкен тонап, тұрғын үйлерге ұрлыққа түскен үш адам ұсталды. Қаладан шығып, кіріп жатқан көліктер тексеріліп жатыр. Балабақша тәрбиеленушілерінің бәрі шығарылды. Туысқандарында болған балалар ата-аналарына табысталды. Бүгін арыз-шағым жоқ", – деді министр.