742

Шымкент әкімі үй мен жер сұрап көшеге шыққан Арыс тұрғындарының алдына келді

Шымкент әкімі сабырлық танытуға шақырды.
Фотография - Шымкент әкімі үй мен жер сұрап көшеге шыққан Арыс тұрғындарының алдына келді Сурет: shymkent.gov.kz

Шымкент әкімі Ғабидолла Әбдірахымов жаңа жер мен үй сұрап, қаладағы Тамерлан даңғылын жауып тастаған Арыс тұрғындарымен кездесті, деп хабарлайды Today.kz Zakon.kz сайтына сілтеме жасап. 

Қала әкімінің баспасөз қызметі хабарлағандай, Президент тапсырмасымен Арыс қаласын қалпына келтіру жұмыстарының қалай жүріп жатқанын ел Үкіметі қадағалап отыр. 

Зардап шеккендерге бүкіл ел болып көмек көрсетуде. Шымкент тұрғындары да Арыс тұрғындарына қолдан келгенше көмек беріп жатыр. 

Қалада 56 эвакуация бөлімшесі бар, ол жақта 39 400 адам тіркелген. Әбдірахымовтың сөзінше, осы эвакуация бөлімшелері адамдарға ең қажетті тұрмыстық заттары мен азық-түлік беріп отыр. 

Шымкент әкімі сабырлық танытуға шақырды. Ол қалада көлік жолын жауып, жер мен пәтер талап ету қолданыстағы заңнамаға сәйкес келмейтінін атап өтті. 

"Сіздер Шымкенттен үй сұрап отырсыздар. 130 мың адам кезекте тұр, мүгедектер, тұрмысы нашар адамдар бар. Оларға не айтам? Сіздерге бермеймін, Арыс тұрғындарына беремін деймін бе? Олар да адамдар", – деді Шымкент әкімі. 


Естеріңізге салайық, Арыста 24 маусымда жарылыс болды. Тұрғындар эвакуацияланды.