1112

Заңды тұлғалар банктен шешетін ақшаның шекті көлемін бекіту қажет – Назарбаев

Мемлекет басшысының сөзінше, көлік, үй сынды ірі сатып алуларда қолма-қол ақша жүрмеуі тиіс.
Фотография - Заңды тұлғалар банктен шешетін ақшаның шекті көлемін бекіту қажет – Назарбаев Көрнекі сурет

Заңды тұлғалар банктен шешіп алатын ақшаның шекті көлемін бекіту қажет. Бұл туралы бүгін Үкіметтің кеңейтілген құрамдағы отырысында Елбасы Нұрсұлтан Назарбаев айтты, деп хабарлайды Today.kz ҚазАқпаратқа сілтеме жасап. 

"Заңды тұлғалар банктерден шешіп алатын қолма қол ақшаның шегін бекіту қажет. Ұлттық банкпен бірге мұны зерделеу керек. Көлік, үй сынды ірі сатып алуларда қолма-қол ақша жүрмеуі тиіс. Ол жақта жасырын мәміле бар", - деді Елбасы. 

Мемлекет басшысы жеке тұлғалардың бюджетке қомақты ақша қарыз екендігін және оны әлі күнге өтемей отырғандығын атап өтті. 

"Бүгінде 1,3 миллион жеке тұлға бюджетке көлік, мүлік және жер салығына  қарыз. Бұл 17 миллиард теңгеден астам қаржы, оның 5 миллиард теңгесін есептелінген өсімпұл құрап отыр. Мен бұған дейін де айтып, Үкіметке негізгі салықты төлейтін болса, онда жеке тұлғаларға осынау 5 миллиард теңге өсімпұлды алып тастайтын  салықтық рақымшылық жүргізуді тапсырғанмын",  - деді ҚР Президенті.