483

Танымал пиаршы Түркістанда Әкелер институтын құруды ұсынды

"Jas Túrkіstan-2019" балалар шығармашылық марафоны жаңа жоба ретінде алғаш рет өткізіліп отыр.
Фотография - Танымал пиаршы Түркістанда Әкелер институтын құруды ұсынды Суретте: Азамат Битан

Түркістан қаласында өтіп жатқан "Jas Túrkіstan-2019" балалар шығармашылық марафонында танымал блоггер, пиаршы Азамат Битан тұңғыш Әкелер институтын Түркістан облысында құруды ұсынды, деп жазады Today.kz.

"Жастар жылының ресми ашылуында Елбасымыз Нұрсұлтан Әбішұлы осы идеясын бөліскен еді. Арада біраз уақыт өтсе де іске аспай қалған секілді. Дәл осы Әкелер институты ең әуелі жаңадан құрылып жатқан Түркістанда, түркі әлемінің алтын бесігінде іске асса нұр үстіне нұр болар еді. Оған құрметті ақсақалдардан бастап үлгілі деген жас әкелерді топтастырса болады. Институттың басты миссиясы – жас отбасылардың ажырасу жағдайларының алдын алу, әр түрлі себептермен әкесіз қалып жылу іздеген балалармен жұмыс жасау, мектептегі әлімжеттікке жол бермеу, жетімдер үйінің болмауын қадағалап, әлеуметке үлгілі отбасыларды насихаттау. Медиацияның міндеті екі жақты сотқа дейін татуластыру болса, Әкелер институты сол ұрыс пен араздыққа, бассыздыққа жол бермейді. Түркістаннан аузы дуалы дана да, ақыл айтар жанашыр аға да табылады. Облыс басшысы Өмірзақ Естайұлына осы ұсынысымды жеткізсеңіздер екен", – деді Азамат Битан.

Айта кетейік, "Jas Túrkіstan-2019" балалар шығармашылық марафоны жаңа жоба ретінде алғаш рет өткізіліп отыр. Шараға Нұр-Сұлтан мен Алматы қалаларынан танымал балалар басылымдары мен сайттардың редакторлары, телеарна жетекшілері, анимация саласының мамандары, журналистер шақырылған.

Загрузка...